चाकण | दि. ८ ऑगस्ट २०२६

आंबेठाण रोडवरील एस.के.एस. फास्टनर्स लिमिटेड कंपनीत क्रेन ऑपरेटरच्या निष्काळजीपणामुळे लोखंडी अँगल अंगावर पडून एका कामगाराचा मृत्यू झाल्याची घटना २ ऑगस्ट रोजी सायंकाळी घडली. या घटनेनंतर चाकण औद्योगिक परिसरातील कामगारांच्या सुरक्षेचा प्रश्न पुन्हा ऐरणीवर आला आहे.

पोलिसांनी दिलेल्या माहितीनुसार, अजय मदनलाल (वय २६, रा. झिजाईमळा, चाकण) हे कंपनीत काम करीत होते. २ ऑगस्ट रोजी सायंकाळी सुमारे ६ वाजण्याच्या सुमारास आरोपी दिलीपकुमार सीताराम चौधरी (वय ३२) हा MH-14-GH-8977 क्रमांकाचा हायड्रॉलिक क्रेन चालवत होता.

कंपनीच्या शॉप फ्लोअर विभागात ब्रिज क्रेनखालील लोखंडी अँगल उचलून खाली घेत असताना क्रेनला अचानक झटका बसला. त्यामुळे अँगलचा तोल गेला आणि त्याचा धक्का बाजूच्या लोखंडी अँगलला लागला. ही अँगल खाली पायऱ्या चालत असलेल्या अजय यांच्या अंगावर पडली. गंभीर दुखापत झाल्याने त्यांचा मृत्यू झाला.

या प्रकरणी चाकण उत्तर पोलिसांनी क्रेन ऑपरेटरविरुद्ध गुन्हा दाखल केला असून, पोलिसांच्या माहितीनुसार क्रेन स्वतःच्या तसेच इतरांच्या जीवितास धोका निर्माण होईल अशा पद्धतीने चालवून निष्काळजीपणा केल्याचा आरोप आहे. गुन्हा क्रमांक ६५३/२०२६, भारतीय न्याय संहिता कलम १०६(१) अन्वये गुन्हा दाखल करण्यात आला असून पुढील तपास पोलीस करीत आहेत.

🔴 आता DISH चिंचवडच्या कारवाईकडे लक्ष

औद्योगिक आस्थापनांमध्ये कामगारांची सुरक्षा, यंत्रसामग्रीचा सुरक्षित वापर आणि अपघातांची कारणमीमांसा याबाबत औद्योगिक सुरक्षा व आरोग्य संचालनालय (DISH) ही संबंधित यंत्रणा आहे.

त्यामुळे चाकणमधील या गंभीर औद्योगिक अपघाताची DISH चिंचवड कार्यालयाकडून तातडीने दखल घेतली जाणार का? कंपनीतील क्रेनची सुरक्षितता, ऑपरेशनची पद्धत, संबंधित सुरक्षा उपाययोजना आणि अपघाताची कारणे यांची तपासणी होणार का, हा प्रश्न आता उपस्थित होत आहे.

एका कामगाराचा जीव गेल्यानंतरच औद्योगिक सुरक्षा यंत्रणा सक्रिय होणार, की अपघाताची गांभीर्याने दखल घेऊन तातडीने प्रतिबंधात्मक कार्यवाही केली जाणार? याकडे चाकण औद्योगिक क्षेत्रातील कामगार आणि उद्योजकांचे लक्ष लागले आहे.

उद्योग सुरू राहणे महत्त्वाचे आहेच; मात्र उद्योगातील प्रत्येक कामगार सुरक्षितपणे घरी परतणे त्याहून अधिक महत्त्वाचे आहे.



UdyogNews.in | चाकण MIDC | कामगार सुरक्षा | औद्योगिक अपघात